weather-image
19°

Jümmer unverzagt!

WI KÖRT PLATT

veröffentlicht am 05.11.2009 um 19:00 Uhr
aktualisiert am 02.12.2009 um 18:00 Uhr

WI KÖRT PLATT

teohaupe: zusammen stäket: stecken

Kräuger: Gastwirt

strieken: streichen

inelaet: eingeladen fiul: faul

Wisch: Brief

Hahnejökelei: Spaß, dummes Zeug Botterstück: Butterbrot

Sünd alle teohaupe eole Frünne von mek, miene Unverzagten. Un wi dräpet ösch alle veier Weeken. Tja, un denn bummelt wi seo’n betjen dör’n bunten Harwest. Freuher, as wi noch jünger wören, marscheeren wi mannichmaal en halwen Dag dör use schoine Weserbergland. Word aber nu weiniger, denn de jüngste word graade achtig un de öllste is seebenunneegentig (97!). Darümme stäket wi nu leiwer iuse Foite unnern Disch un vertellt ösch wat, mehrstens von freuher. Gloibet man nich, bloot dei Friusluie vertellt geern, dat könnt wi eolen Recken ook! - Vor’n paar Dagen sünd wi maal weer naa’r „Ponderosa“ foihert. Is jedetmaal en banniget Vergnögen, gemeutlich in düssen Gasthiuse hinner Lügde teo sitten. Un, glöffstet oder glöffstet nich, da gifft et jümmer noch dei gröttsten Tortenstückens! Mek löppet noch et Water in’n Munne teohaupe, wenn ek dran denke! - Na jaa, da sitten gahn, vertellen, et sek smecken laten, düt allet passet teo ösch. Dütmaal fong Wilhelm an, hei was Kräuger in Kerkohsen. Seo’n Gasthius was freuher jümmer Middelpunkt in’n Dörpern, da güng et lustig teo. Wilhelm erinnere sek an seo’n verrücketen Gast, wenn de naa Hiuse gahn wolle, reip hei liut in dei Gaststoben: „Kräuger, schreiwet allet teohaupe an un wenn diu Geld briukest, denn striekestet dör!“ Denn erinnere hei sek noch an’n eolen Fründ, wenn düsse Minsche teo’n Gebiurtsdag inelaet harre, säe hei teolesst: „Wer getze noch nich besopen is, de is teo faul teo’n Drinken!“ - Tja, un denn was Hannes dran, de vertelle von’n eolen Fründ. Wenn düsse Kumpan teo sienen Gebiurtsdag inlae, säe hei jedetmaal weer: „Wenn jei denn komet, könnt jei geern gegen miene Döör trampen, Hauptsake, jei hebbet beide Arme vuller Geschenke!“ Un denn gaff Hannes noch teo’n Besten: „Kreig‘ ek doch maal seo’n Wisch von mienen Lieferanten mee’r Mahnunge: „Wir wundern uns sehr, dass der Betrag noch nicht eingegangen ist... usw.“ Hannes antwore prompt: „Sie brauchen sich nicht zu wundern, ich habe das Geld noch gar nicht überwiesen!“ - Tja, seo komet wi eolen Bengels up seo manniche Hahnejökelei ut eolen Dagen. Mek wollen se ook eint iutwischen: Et güng ümme düsse dicke Beilage „60 Jahre Wiedererscheinen Dewezet“. Conrad meine: „In Kerkohsen, da was maal seo’n eolen Knecht, de konne nich läsen, hei harre aber dei Zeitunge bestellt, da wickele hei jeden Dag sien Botterstücke rinter!“ „Konne hei naa düsse dicke Beilage afbestellen un härre doch noch for’n halwet Jahr sien Botterstücke inwickeln können“, griene Walter. – Sühste woll, bie ösch Unverzagten bringet einen jeden dat rechte Woort an’n rechten Fleck. Wat mott, dat mott, aber jümmer unverzagt!

Weiterführende Artikel
    Anzeige
    Kommentare