Dossier Fiffi Voss

WI KÖRT PLATT

veier: vier blifft: bleibt up’n Stutz: plötzlich

kleoket: kluges dateomalen: damals öllste: älteste

Smack: Geschmack

Teeleepel: Teelöffel jök: euch teohaupe: zusammen

iutteorollen: auszurollen droften: durften vergäten: vergessen

Fiffi Voss vertellt

Wi kloppet öfters Skat: Veier eole Bengels, davon twei Bäckermester, ein Bäckergeselle h.c. un eine, de et sek ook geern geot smecken lett! Seo twischendör reget wi ösch aberst mannichmaal düchtig up. VorichteWeeken ober dei Spekulanten, düsse Filous, dei sogaar in iuse Eurokrise jümmer noch seo’n Lock finnet, wo for düsse Slaumeiers wat drin hängen blifft! Na jaa, ein Woort gaff dat annere, bet mek up’n Stutz seo’n kleoket Woort von düssen eolen amerikanschen Mississippi-Dichter Mark Twain in’n Sinn kam. De konne kein Plattduitsch, aber hei kenne woll dateomalen al geneog Spekulanten, as hei schreiw: „Es gibt zwei Zeitabschnitte im Leben eines Mannes, in denen er nicht spekulieren sollte: Wenn er es sich nicht leisten kann und …, wenn er es sich leisten könnte!“

„Suihste woll“, meine iuse öllste, Conrad, „worümme reget jei jök denn seo up, latet doch düsse Dölmers spekuleeren, mehr as sek satt äten könnt dei doch ook nich! Un denn was hei bie sienen Thema, hei lache un vertelle: „Gistern hebbe ek mee mienen Gesellen Fiffi Spekulatius ebacket. Tja, is ja noch ober acht Dage hen bet teo’n Hilligen Abent, villichte will de eine oder annere von jök ook maal we’er Spekulatius backen.

Heier is mien Rezept: 750g Mehl (405), 250 g Puderzucker, 250 g Botter, 2 Eier, 1 Prise Solt,

Gewürze naa’n eigenen Smack. Wi briuken: 3 Teeleepel Zimt, 1 ½ Teeleepel Ingwer, ½ Teeleepel Nelke, ½ Teeleepel Muskatnuss un ½ Teeleepel Macisblüte, 1 Päckchen Vanillinzucker un nich vergäten: Dei Schale vonner Orange afreiben un dateo geeb’n! - Versoiket et maal un ek verspräke: Jök löppet et Water in’n Munne teohaupe! Doch vergätet nich, düssen Teig, seo dünne, as et eben geiht, iutteorollen! Glöffstet oder glöffstet nich: As wi denn noch sienen Spekulatius probeern droften, harren wi dei dusseligen Spekulanten längst vergäten!